Montag, 23. Februar 2009

Ein Alptraum der speziellen Sorte...... oder Pleiten, Pech und Pannen im Spital, die niemanden interessieren!

Das send so mini Erläbnis woni während de letschte paar Woche gha ha in Sache Spital... ond wo mi mängisch wörkli am mönschliche Verstand lönd lo zwifle.

S het alles agfange wo mini Grosstante, nenne mer si Gertrud, chorz nach de Wienacht het müesse i Spital ond zwar hets ere Mund, Spiisröhre ond Mage verätzt gha wöl sich 2 Ärzt ned wörkli korrekt mitenand abgsproche händ. De Rheumaarzt het ere es (falsches) Tablettli verschribe wöl de Huusarzt ehm ned di ganz, korrekt Krankengeschichte gä het.

Ich be denn set i vo Australie deheim be all Woche sicher einisch si go bsueche ond ha zom Teil haarsträubendi Sache mitbecho....

Es esch ergendwenn use cho dass das Tablettli nur i wenige Fäll för Rheumapatiente brucht werd... i de meischte Fäll wirds als Chemotherapie für Krebspatiente agwändet. S händ ere alli Hoor glo ond alli Organ bis uf Niere one Läbere händ Schade gno. Si het ou Wasser of de Lunge gha. Di erscht Bluttransfusion esch völlig ed Hose.. wortwörtlich... s esch nämmli alles Blut wo si obe ineglo händ onde weder usecho. Di 2. Transfusion het si denn verweigeret wöl si eifach nöm het welle ond chönne. Da sie no ganz klar im Kopf gsi esch het mer nüt chönne mache... wenn si das verweigeret ond wott stärbe de mues mer si lo. Nach lange öberredigsversüech vo minere Tante het si denn doch no igwilliget ond het sich Schritt für Schritt zrogg es Läbe kämpft.

Of jede Fall esch si de es paar Woche a de Infusion ghanget..ond es eshc ere wörkli emmer chli besser gange... bes plötzli en Arzt s Gfüel gha het da göii nömme iez müesis vorwärts go.. die Infusion mues weg. Okay gesagt, getan. Mini Tante het denn no bemerkt dass d Gertrud jo die grosse Tablette gar ned cha nä, die ganzi Verätzig sig jo nonig so lang här. De het er gmeinnt: "Jo wenn si die Tablette ned cha oder wott nä, de luege mer de halt was passiert" <- scho nor dä Satz esch zum Hoor usrisse gsi...

Si esch vo denn här emmer chli schwächer worde wöl d Schwöschtere händ ere die Tablette halt ned g mörseret sondern halt eifach häregleit nach em Motto friss oder stirb... wenn d Tante det gsi esch het si d Kapsle ufto ond die andere chli g hacket ond das ganze e de Gertrud is Birchermüesli ineto...

Ergendwenn esch de minere Tante ufgfalle dass ab ond zue wenn si chonnt am Nomitag schtot no ergend es Tablett mit Esswaren droffe im Zimmer. Meistens mit eme Milchshake wo scho sit öppe 4 Schtond a de Wärmi schtot. Es esch denn us cho dass das mit em "Mittagessen" folgendermasse funktioniert:

D Krankeschwöschter chonnt is Zimmer mit eme Tablett voll Esswaren, stellts of en Tisch wo öppe 3 Meter vom Bett weg schtot, wönscht en Guete ond got weder use. Mer mues do dezue erwähne dass d Gertrud afig no 40 kg schwär esch, ned elei us em Bett use cha, s einzige wo si cha esch e chli trinke wemmer ere de Becher richtig ed Hand ine get, elei nä cha si de Becher nömme.

Da heisst die arm Frau hätt jo ned mol chönne elei ässe wenn mer ere das Tablett vor d Nase häre gschtellt hätt... wie söll sis de mache wenn das Ding of eme Tisch schtot wo öppe 3 Meter vom Bett weg esch???

Nach öppe 2 Schtond esch ame die Schwöschter weder is Zimmer ine cho het anschinend amigs no gfrogt: "Aber Frau ...... händ si nüt gässe, kei Hunger gha?" Het s vollne Tablett weder gno ond esch verschwunde.

No schlimmer hets mit em Trinke usgse. Mini Tante esch emmer vom Mittag am 5i bes am Obe am 10ni bi ere gsi. Het ere s Znacht gfüetteret ond ere z trinke gä. Vo de Krankeschwöschtere het ere nie eini öpis z trinke gä... da heisst wenn d Gertrud emol de ganz Tag kei Bsuech gha het...

... het si 19 Schtond nüt trunke!! Nämmli vom 10ni zobe bis d Tante weder cho esch am Nomitag am 5i. 19 Schtond ohni Flüssigkeit.. das mach ned mol ich als gsunde Mönsch. Es tuet mer leid aber da esch jensiits vo mim Vorstelligsvermöge...

De hämmer mol gfrogt worom dassi ere nüt gänd.. ond d Antwort esch gsi: "Mer send do of de Medizinische Abteilig.. das esch sozäge en Durchlaufabteilig... also d Patiente chöme ond gönd... mer händ kei Ziit för das....mer send do ned of de Pflegeabteilig.. det hämmer nämli momäntan kei Platz"

Jo super! Aber wennt doch is Zimmer ine gosch zom luege wies so got de chasch ere doch 2 Schlück Wasser gä.. oder esch das z vil verlangt. Warschinli scho jo!

Ah, s allerbeschte hani vergässe z erwähne. Alli andere Patiente of de Abteilig send am Morge am 7ni gweckt worde, anschliessend gwäsche ond fürs Zmorge agleit. Ossert d Gertrud, sie het mer ersch chorz nach de 11i parat gmacht. Mit de Begründig... si ässi eh immer nur 3 Löffeli Joghurt am Morge... für das mües mer si also ned so früe scho ufnäh, alegge ect.... Si händ sich warschinli dänkt da passi grad.. eini weniger i de stressige Ziit... die mache mer parat wemmer grad de Ziit händ... chorz vor em Zmittag. Toll! Wörklich!

Wenn das ergendöper minere Tante mol gseit hät.. dassi si ned chöne/wänd füetere, de hätt si öper vo de Familie chönne mobilisiere wo ere wär go s Zmittag igä. Aber wemmers ned weiss meinnt mer es klappi alles so wie sött. I gloube langsam aber sicher dass mer imene Spital nie dörf devo usgo, dass alles klappet!

Denn händs diskutiert wenn si weder hei cha.. de mües si bes si weder richtig cha laufe ines Pflegeheim. De het mer beschlosse si chonnt a erem Wohnort vorübergehend is Altersheim bis alles weder guet esch. Ergendwenn het denn i de Tante de Chef vo dem Altersheim aglütet ond gseit es sig es Zimmer frei, ebs de Gertrud so guet göi dassi chön cho. Mini Tante het sich zersch mol sehr gwunderet wöl si dänkt het das tüei mer de ersch organisiere wenns sowiit esch ond het nomol nochegfrogt. De nätti Maa het ere denn erklärt es heig en Frau vom Spital Menziken aglütet ond d Gertrud devinitiv förs Altersheim agmäldet. Also für immer, ned nur vorübergehend. Mini Tante het fasch s Telefon lo gheie.

Am 3. Februar händs de äntli es Zimmer of de Pflegeabteilig frei gha. Mer händ scho dänkt de Alptraum heig äntli es Ändi. Jo of de Pflegeabteilig lueges de guet zuenere. Det tüends ere s Ässe wörkli igä ond si chonnt ou emmer z trinke öber ond ou sösch werd iez wörkli gluegt för si.

Es het denn gheisse si chön nonig höt go, es sig ned guet för d Patiente wemmer si zmitst am Tag tuet zögle... das machi mer am Beschte am Morge. Si chön de am 4. am Morge go...

Am 4. am Morge händ si gseit.. nei de Bodelegger sig no dete.. si mües no e Tag warte.

Am 5.2 am Morge am 5i esch si gschtorbe.

Ond i mues ganz erlich säge.. si het rächt gha! Ich hätt das Theater ou nömme länger metgmacht.

Mini Tante het sehr Müeh demit wie bzw. onter welne Umschtänd eri Mueter het müesse go. Ich be 100% de gliche Meinig. Imene Spital lauft ned immer alles wies sött... aber Sache wie en Infusion usenä aber nacher nüt z trinke gä.... oder das mit em Ässe... da esch eifach ned in Ornig.

Jä nu....ich gönne ere die ewigi Rueh.. es esch zwar sehr tragisch wie si het müesse die Welt verlo.. wemmer bedänkt dassi 7 Woche bevor si gschtorbe esch no för e 6-chöfigi Familie kochet het. Was en Bsuech bimene Rheumaarzt alles cha bewirke. Es sind halt veli chlini mönschlichi Fähler, wo ned hätte dörfe si, wo sich mit de Ziit summiert händ.

Im 1964 het si de erscht MS- Schub gha 2004 het si ere geliebt Ehemaa verlore wägeme Fähler vom obe genannte Hausarzt.... ond iez no das ganze Theater do.

Trudi.. egal wasd iez machsch oder wot besch.. i wönsch der alles Gueti ond dassd iez glücklich besch ond di Frieden hesch!

"Weinet nicht an meinem Grabe
tretet leise nur hinzu
seht was ich gelitten habe
gönnt mir nun die ewige Ruh"

Kommentare:

Sven hat gesagt…

Das isch jo zum Haare ausriesse. Und jedi vo dene erwähnte Persone wo verseit händ händ sicher a gueti Usreed, dass sie gar nünt dafür chönd, sondern die Andere sie falsch instruiert händ oder kei Zit überchämed. Was tragischerwiis jo zumene Teil au stimmt.
Wird sich wohl au niemerd entschuldige, denn das wär jo äs Iigeständnis fürs Versäge, sowohl persönlich wie au rechtlich.

Also ich gange nur no gsund in Spital...und wenn möglich au use.

corinne hat gesagt…

das duet mer leid.... jo ächt zom hässig wärde so öpis...