Donnerstag, 11. Dezember 2008

Auckland

Dä Blogitrag hani scho geschter gschrebe gha dorom stimmts ned so öberii mit de Datum :o) aber s Internet het ned da gmacht woni ha welle dorom stelli ne ersch höt online :o)

Nachdemi de Marc am Floghafe öberrascht ha, ond er sich sehr gfröit het, hämmer is ine Bus quetscht ond send zom Hotel gfahre. S Zimmer esch toll gsi, Tänele het e gueti Uswahl troffe gha. Mer händ de Hafe gse mit es paar Schiffli vom Americas Cup ond de Marc het also gfonde da sig jo nüt anders als wenn er of em See i de Lenzerheid mit eme Segelbootli ometuckeret. Mer händ de no ofeme Schild gse dass e Jacht z verkaufe wäri.. de hämmer gfonde mer chönnte doch alüte ond säge mer heige 400 $ eb mer si grad chöne cho abhole ;o)

Am Obe semmer de ine Bar wo -5° heisst. De hämmer en warme Mantel becho ond Händsche ond de hämmer 25 minute chönne i die Bar ine... d Einrichtung esch alles us Eis ond es esch ebe minus 5 grad :o)) meega cool im wahrschte Sinn vom Wort.

Geschter hämme öise Toyota Bus in Empfang gno ond send iez onterwägs. Geschter hämmer imene chline Dörfli öbernachet. I dem Dorf hets 2 Restaurants, s einte esch gschlosse am Zischtig, de hämmer halt is andere müesse. Mer händ denn em Marc sin Geburi mit Fish and Chips ond Pasta gfiiret ond er met eme Bier :o)

Aber e schöne Campingplatz händs gha i dem Dörfli. Aber es esch halt eifach chalt am Obe ond wennt us de Duschi usechonsch gosch fasch drauf wöls so chalt esch. De chonsch i Camper ond s esch emmer no chalt. Aber mer händ es chliises elektrischs Öfeli ond en Schriibtischampe. Mer händ de usegfonde dass die Lampe no rächt warm get wemmer si azünd ond so hämmer s Öfeli nonig mol bruucht. Em Momänt semmer grad in Lake Tekapo. Mega schöni Ussicht, türkisbalue See... jo wörkli de Traum. Aber sösch ned vel z mache. Mor gömer no go bade i so heissi Quellene. Jede Obe luege mer en Dvd vor em schlofe. Geschter hämmer „Eine Frage der Ehre“ gluegt. Enes paar Täg hämmer denn alli dore woni debie ha :o)

Öbrigens de Marc het scho 3 oder 4 Vögel of em Gwösse, si send i Camper ine gfloge of de Autobahn. Also ned so grossi sondern chli grösser als Spatze sinds. Aber glich.. schwizer Vögel flüge devo wenn es Auto chonnt, i ha emu no nie of de Autobahn oder sösch nöime e Vogel abgschosse. Ond do innerhalb vo eim Tag grad 3. Komisch komisch...

Sodeli iez muesi ed Chälti use go dusche ond de wartet es dvd of mi... obwohl de Marc liet grad relativ flach näb mer zue weiss de ned eb er höt nomol verwachet.... Kopfwehtablette ond es Bierli vertreit sich halt doch ned so guet wie mer meint ;o)

2 Kommentare:

fa hat gesagt…

wo chont mer so schriibteschlampe öber? .bibber.

tänele hat gesagt…

also inzwösche hämmer ou s öfeli vöregno wo sogar e thermostat denne het wo automatisch abstellt wenns z warm esch ond alot wenns z chalt werd.

Aber de marc het also vorgschlage du sölsch doch de hund mit es bett nä, dä gabi schön warm.

Machs guet. glg vo öis