Wir habens getan... zum aller ersten Mal ;o)

Mer send z Queenstown gsi go Canyon-Surfe. Das bedütet mer händ is amene Seili ine Schlucht abegstürzt :o)) ond es esch soo meega geil gsi. Zersch 60m freie Fall ond denn schwingsch di eifach chli i dere Schlucht hin und her. I muses also zuegä dasi 2 Aläuf brucht ha besi traut ha.. aber s esch denn omso geiler gsi. De Marc het sich todesmuetig eifach chopf-vora ed Töifi gschtorzt. Ich has bevorzugt dassi mi sitzend id Schlucht use ghänkt händ ond de eifach amene rote Drath zoge händ ond ich denn abegheit be. Juhuu...

Nochär semmer no mit em Gondeli of de Berg ufe gfahre ond händ det obe chli s schlächte Wätter gnosse... ond ganz wichtig! De Marc het mir of d Wiehnacht es Plüsch-Schöfli kauft :o) * strahl und in die Hände klatsch* es esch ganz kuschelig ond mer chas als Chüssi benütze. Mega cool!! :o)))

Go riite semmer ou no.. send verschideni Drehort vo herr der Ringe go aluege. Esch mega schön gsi! I hanes relativ nätts rössli becho.. aber er het d Macke gha dass er plötzlich bockstill gschtande esch ond seeleruhig gfrässe het während sini Kollege brav wiiter trottet sind. Ond Fröid a chline Bächli het er also ou gha... wenn er eis gse het het er müesse dröber gompe... es hät ou glängt wenn er chli e grössere Schritt gmacht hätt... aber nei er het müesse e Satz dröber nä wiener de halb Nil müesst öberquere... es männli halt... die müends jo schliessli emmer öbertriibe ;o)

Es sind alles Hengste gsi... i ha scho emmer gseit meer sött nie so vel männlichi Wäse of eim Huuffe lo si, da chonnt nie guet use ;o)

Am Obe semmer ed minus 5° Bar... mer send jo scho z Auckland i so einbere gsi. Esch cool gsi wie letscht Mol.

Höt semmer Shantytown gsi, das esch en alte Goldgräberstadt. So öpis ähnlichs wie de Balleberg. Veli alti Hüser wot chasch go aluege ou vo inne ond es esch eifach witzig gmacht. Het mer sehr guet gfalle. Mer sind mit ere mega alte Dampfloki gfahre ond händ sälber dörfe Gold schürfe. Mer händ öpis gfonde.. de Marc allerdings meh als ich :o( Egal ...Spass hets sowiso gmacht.

Geschter Obe hämmer e mega coole Sonneontergang gse... wow! Sodeli iez gots de scho gli weder is Bett. Heieiei die Täg gönd ou weder schnäll verbie. Scho gli beni weder deheim. Hui ;o)

Also bis bald meine leute... Cheers

Steward Island

Am Sonntigmorge semmer zersch go d Moeraki Boulders aluege, das send so halbkugelförmigi Stei am Strand. Denn semmer witer gfahre nach Invercargill ond det hämmer öbernachtet. Am Mäntigmorge semmer denn of Steward Island mit de Fähre, de Marc het gfonde d Fähre sig vel cooler als miteme Chliflugzüg wo ned vel tüürer gsi wär. Mer sen dete chli go omespaziere ond händ d chline Dörfli agluegt. Steward Island het 400 Iwohner. Nachher hämmer no e Tour miteme chline Bus gmacht wo is chrüz ond quer dor d Insle gfahre het. Bevor mer weder of d Fähre send ha ich druf bestande dass mer Ingwer Tablette chaufe gäges schlächt werde. Si händ sich also sehr bewährt, die cheibe Fähre het gschauklet ond gmacht.. mer eschs weder mol pudelwohl gsi oder emu fasch... de Marc het sich nöm sooo wohl gfüelt.

Tanja: Wie gots? Eschs der schlächt?
Marc: Jo scho chli!
Tanja: Jo guet, wisser alsd eh scho besch chasch jo nöm wärde ;o)

Denn simmer no en Ussichtspunkt go aluege, esch wonderschön gsi, mer händ bestimmt 10 meter wiit gse vor luuter Näbel ;o)

Mer sind denn of Tuatapere gfahre ond händ dete öbernachtet, händ is no es Dvd inezoge „Magnolien aus Stahl“ det hämmer glernt dass alli schwule Manne emmer Marc oder Steven heisse ond Hallogenlampene händ :o))

Am Morge isches witer gange. Es het grägnet wie us chüble, i gloube die lönd di ganz Johresmängi a Räge abe i dere Ziit wo mer do send :o( S het sogar so feshct grägnet dass em Marc sini Schue völlig dorcvhweicht worde sind.

Iez semmer z Te Anau, gönd gli go Pizza ässe ond eventuell chli go s Nachtläbe gnüsse. Mer choche sösch fasch imer sälber ond es werd immer mega fein, mer sind sehr erstuunt öber die Tatsach ;o)

Cromwell and Dunedin

Mer send rächt lang i dene heisse Quelle gsi am Donnschtig morge. S het 3 verschideni Pool gha. De erscht isch 36° de zwöit 39° ond de dritt 42° gsi. Bim dritte het de Marc also e halbe Kreislaufkollaps becho. Ich bi de ganz tapfer laaangsam dri, aber ou gli weder use. Denn simmer is Dampfbad ond nacher no ed Sauna. Ich be de no i chalt Pool ghüpft de Marc hets vorzoge dosse z warte ond het a minere anschliessende Umarmig ned mol fröid gha. Wer weiss worom???

Also z Cromwell hämmer ned vel gmacht. Mer send weder mol imene Restaurant gsi go ässe. En Mammut Burger ;o) ond händ de weder mol en Dvd gluegt. Es het gschiffet verosse ond esch vo Tag zo Tag chälter worde. Am Obe beni ofs WC ond ha am Morge gmerkt dass da d Männertoilete gsi esch. De hani am Morge welle go dusche ond ha de usegfonde dass bi de Männer vel schöneri Duschine het... wo dasi be go dusche cha mer sich jo iez vorstelle. Esch no intressant gsi während em dusche mit em Marc, wo am Zäh putze ond anderi Sache erledige gsi esch, chönne z plöiderle.

I öisem GPS cha mer igä „berühmte Sehenswürdigkeit“ ond de finds das vo sälber. In Cromwell esch also di gröscht Sehenswürdigkeit en überdimensionale Früchtekorb us Plastik gsi wo am Strosserad schtot. Mer händs de ned gföttelet...
Amene schöne Fluss hämmer e Halt gmacht ond zmörgelet ond zom erschte mol de Gaschocher in Betrieb gno und Tee kochet. Fein! De semmer no go poschte ond da wärs ou scho gsi vo dem Tag. Am Obe semmer z Dunedin acho händ öisi Wösch gwäsche.. es guets Ässe kochet ond de obligati Dvd gluegt.

Dunedin esch e cooli Stadt. Höt semmer zersch go e Schoggifabrik aluege. De Marc ond ich send mit zwöi völlig verschidene Ziel i die Tour gstartet, ich ha wele so vel Schoggi wie möglich abstaube ond de Marc het welle grossi Maschine bi de Arbeit bewundere. Es händ sich beidi Tröim ned erfüllt. S Highlight vo de Tour dor d Schoggifabrik esch es riesigs Silo wo de Guide zersch es Gheimnis drus gmacht het. Wo mer denn im innere di 97 Stufe vo de Wändelträppe hender öis brocht gha händ, het öise Füerer e Schleuse göffnet wodruf ei Tonne flüssigi Schoggi 30 meter im innere vom Silo s Loch ab sind. S het mega toset ond gschprützt, s Treppegeländer ond d Wänd send völlig versprützt gsi – en voll sinnlosi Touristebelustigung wo mit em Produktionsprozess absolut nüt z tue het. Aber loschtig esch es trotzdem gsi :o)

Denn hämmer di steilsti Schtross vo de Wält befahre ond send öberascht ond stolz gsi dass öise Camper das gschafft het. Händ 2 nöii Buchnabelpiercing kauft. S erschte esch eifach zweckmässig gsi, wöli nach langer Suechi nüt anders gfonde ha. S zwöite hani de per Zuefall gfonde 5 minute nachdemi s erschte kauft gha ha. Ah do muesi no dezue erwähne dass s alte völlig de Geist ufgä gha het. Zersch esch de Stei usegheit.. ond denn hani no s Kügeli verlore.... also es het dringend es nöis brucht gha. Do z Neuseeland chonsch Piercing us Chirurgenstahl für 10.- öber, da chönntsch i de Schwiz voll vergässe.. do zahlsch di domm ond dämlich.

Mer händ welle go s einzige Schloss vo Neuseeland aluege, händ im GPS eifach mol Castle igä ond send droflos gfahre. Wonis de das GPS het welle en Fuesswäg doruflotse hämmer denn gmerkt dass es no en chline Ort näbe Dunedin get wo Castle heisst. Na toll. Mer sind de nur 15 km vom richtige Zielort entfernt gsi :o)
Wo mer denn s richtige Schloss erreicht gha händ hämmers för di 25.- wo mer zahlt händ grad dopplet müesse gnüsse :o) De Marc het denn bhauptet ich heig also richtigi Burgfröileingedanke becho.. das söll sich min zuekünftige Ehemaa scho mol of d Liste schribe. Hmm jo schlächt wärs jo ned sones Schloss z besitze ;o) Obwohl es wär natürli vel intressanter gsi i dere Ziit z läbe. Iez eschs warscginli nöm halb so cool es Schloss z bsitze.

Jo ond iez semmer scho z Moeraki of em Campingplatz diräkt am Meer. Wemmer also s Fenster vom Camper wörde öffne wörde mer s Meer ghöre ruusche. Mache mer abe ned wöls velvel z chalt esch. So ond iez muesi weder mol e Internetverbindig go sueche dasi da cha Online stelle

Man liest sich. Cheers....

Auckland

Dä Blogitrag hani scho geschter gschrebe gha dorom stimmts ned so öberii mit de Datum :o) aber s Internet het ned da gmacht woni ha welle dorom stelli ne ersch höt online :o)

Nachdemi de Marc am Floghafe öberrascht ha, ond er sich sehr gfröit het, hämmer is ine Bus quetscht ond send zom Hotel gfahre. S Zimmer esch toll gsi, Tänele het e gueti Uswahl troffe gha. Mer händ de Hafe gse mit es paar Schiffli vom Americas Cup ond de Marc het also gfonde da sig jo nüt anders als wenn er of em See i de Lenzerheid mit eme Segelbootli ometuckeret. Mer händ de no ofeme Schild gse dass e Jacht z verkaufe wäri.. de hämmer gfonde mer chönnte doch alüte ond säge mer heige 400 $ eb mer si grad chöne cho abhole ;o)

Am Obe semmer de ine Bar wo -5° heisst. De hämmer en warme Mantel becho ond Händsche ond de hämmer 25 minute chönne i die Bar ine... d Einrichtung esch alles us Eis ond es esch ebe minus 5 grad :o)) meega cool im wahrschte Sinn vom Wort.

Geschter hämme öise Toyota Bus in Empfang gno ond send iez onterwägs. Geschter hämmer imene chline Dörfli öbernachet. I dem Dorf hets 2 Restaurants, s einte esch gschlosse am Zischtig, de hämmer halt is andere müesse. Mer händ denn em Marc sin Geburi mit Fish and Chips ond Pasta gfiiret ond er met eme Bier :o)

Aber e schöne Campingplatz händs gha i dem Dörfli. Aber es esch halt eifach chalt am Obe ond wennt us de Duschi usechonsch gosch fasch drauf wöls so chalt esch. De chonsch i Camper ond s esch emmer no chalt. Aber mer händ es chliises elektrischs Öfeli ond en Schriibtischampe. Mer händ de usegfonde dass die Lampe no rächt warm get wemmer si azünd ond so hämmer s Öfeli nonig mol bruucht. Em Momänt semmer grad in Lake Tekapo. Mega schöni Ussicht, türkisbalue See... jo wörkli de Traum. Aber sösch ned vel z mache. Mor gömer no go bade i so heissi Quellene. Jede Obe luege mer en Dvd vor em schlofe. Geschter hämmer „Eine Frage der Ehre“ gluegt. Enes paar Täg hämmer denn alli dore woni debie ha :o)

Öbrigens de Marc het scho 3 oder 4 Vögel of em Gwösse, si send i Camper ine gfloge of de Autobahn. Also ned so grossi sondern chli grösser als Spatze sinds. Aber glich.. schwizer Vögel flüge devo wenn es Auto chonnt, i ha emu no nie of de Autobahn oder sösch nöime e Vogel abgschosse. Ond do innerhalb vo eim Tag grad 3. Komisch komisch...

Sodeli iez muesi ed Chälti use go dusche ond de wartet es dvd of mi... obwohl de Marc liet grad relativ flach näb mer zue weiss de ned eb er höt nomol verwachet.... Kopfwehtablette ond es Bierli vertreit sich halt doch ned so guet wie mer meint ;o)

Oha, ghürote, set wenn??

Woni erfahre ha dass de Oli hürotet hani dänkt jo iez esch es also sowiit, de erscht vo mine Ex-Fründe hütotet. Mer wädre alt. Hihi. Aber iez hani grad of Facebook gse dass de Fluri ghürote esch ond es Chind het!!! I ha ned mol gwösst dass er e Fründin gha het. Hui. So schnäll chas go. Oder i be eifach voll ned informiert. Aber s esch also ganz es härzigs Baby, d Noélia! :o)

Wellington

Also i mues säge de erscht Idruck vo Neuseeland esch atemberaubend gsi :o) woni im Flüger ghocket be hani die Ussicht do gha.








Ned schlächt he? D Leonie het mi ou sehr härzlich empfange.. eri 2 Mitbewohnerinne d Claire ond d Weesel wo eigentli Louise heisst, send ou sehr nätt. I ha tolli Täg verbrocht in Wellington ou wenn ned emmer alles so klappet het wies hätt sölle. Mer sind is Museum. De hani gse dass mer chönnt veruse go Fotis mache aber mer händ niene en Usgang gfonde för of d Terrasse, de hämmer eine gfrogt wo det schaffet, dä het is i 4. Stock ufegjagt, natürli kei Usgang det gsi. I ha dänkt do mües ergendwo ossedra e Stäge si, d Leonie het aber gfonde nei die müesi enne si. Mer send de schlussendlich müed gsi wo mer alli 6 Stockwerk usprobiert gha händ. Am andere Tag hani de d Stäge gfonde aber si esch gschlosse gsi wöli chli spot dra gsi be. Heieiei.



Oder wo mini 2 Kreditchartene plötzli leer gsi send obwohli no vor chorzer Ziit gluegt gha ha ebs gnueg droffe het... ond i am Mittwoch Mittag dringend hätt sölle de Bus för Donnschtig Morge bueche. I mues säge i ha ned vel gmacht z Wellington, s esch emmer ergendöpis dezwösche cho, aber immerhin hani chli was vo de Stadt gse wenn ou ned di tyische Touristeatraktione. Be also no imene Beautystudio gsi mini Augebraue lo mache wöl ichs sälber ned of d Reihe brocht ha. Allerdings het si ou 3 Aläuf brucht bes es so gsi esch wies mer gfallt oder emel halbwegs so. Denn beni no zum Hervé da esch e französiche Coiffeur. Er het mini Hoor also sicher 15 Minute gföhnet, be fasch wahnsinnig worde. Aber s esch schön worde. Sehrsehr schön.




Ha dänkt i mües dänk a dere Stell no es Foti inetue sösch stirbt mer min Sven no amene halbe Herzinarkt wöl er meinnt i heig si chorz abgschnitte, nachdemi nur verzellt ha ich heig e französische Schnitt verpasst öbercho :o)) Guet er sött sich jo um mich ome afig vel gwöhnt si ;o)) hehehe.


Mit de Leonie beni gsi go Mövenpick Glace ässe, is Kino de James Bond go luege, inere Jazz Bar go chlille. Esch cool gsi :o) Ha de James ned so guet gfonde.. ergendwie d Kamerafüerig passt mer ned. Es esch mer halbe schlächt worde. Wenn d Actionszene chli vo wiiter wäg gfilmet worde wäre... hätts meh Fun gmacht :o)

Geschter beni öppe am 2 zmittag z Tapo acho, ha as Aschlagbrett gluegt ond gmerkt dassi kei Aktivität me cha mache. De beni de Lake Tapo go sueche. Be sogar bis zo de Chnöi inegange :o)) Voll nice. Ha em schwarze Schwan zuegluegt... d Entileins beobachtet. Eifach voll chlillt ond d Sonne gnosse.

Iez beni scho z Rotorua. Mues säge die YHA do send vel schöner als die z Australie. Morn goni velech öpis ähnlichs go mache wie Bungiejumping. Du wersch eifach so ines schlafsackähnlichs Ding inepackt ond de a Gummiseil abegworfe. De flügt mer met 130km/h dor d Luft. Tönt intressant aber mer chasch ou z zwöite oder z dritte mache. Ond i weiss ned ebi söll warte bi de Marc ou do esch. Er wär sicher ou debie :o)) hihi. Aber i weis ebe ned wa mache sösch... i verzelle de wani gmacht ha.

Do z Rotorua cha mer ebe ned vel mache ossert Skydive, Bungiejumpe, Riverrafte (wördi alles nur mit em Marc mache) öpis wot inere Gummikugel inne de Hang abegrollt wersch (do werds mer sicher schlächt) ebe da Schlofsackflüge ond no ergendöpis anders, es gset us wie en Schwebebahn (zb z Tokio hets gloub eini) aber muesch eifach sälber trampe. Velech machi de das, de hani emu öpis gmacht :o)

Sodeli mues go choche, mues go üebe för öises Campervan-Läbe :o) Sii juu...