Great Ocean Road

I ha 3 hammergeili Täg erläbt. Super Groppe, coole Guide, eifach de Wahnsinn. Be sehr sehr froh dasi die Tour buechet ha. S esch wörkli chli das wo mer onter eme Roadtrip verschtot :o)

Agfange hets mit eme Gschichtli wo öis de John-Paul, chorz JP, verzellt het. Normalerwis fahrt er nor Adelaide-Melbourne ond weder retour. Aber eine vo der Guides wo Alice Springs-Adelaide fahrt, 7 Täg dors Outback esch chrank worde. Sin Chef het ehm de so lang es schlächts Gwösse gmacht bes er tatsächlich gseit het "Okay ich mache die Tour obwohli no nie im Outback gsi be." Si send also losgfahre, de erscht Tag esch guet verloffe. Am Obe wo si händ welle go schlofe het er dänkt er fahri chli nöcher a Schlofplatz häre, esch vo de Stross abegfahre ond steckeblobe. " 2 Schtond händ si brucht bes de Bus weder of de Schtross gsi esch ond nöm im Sand. Am andere Tag eschs grad witergange, er het dor e riisigi Chuehärde müesse dorefahre, es send alli of de andere site vo de Schtross gsi wo us em (warschinli einzige) Busch en "Teenage Cow" use cho esch, er het si natürli ned gse ond het si öberfahre. S domme esch gsi, si esch sehr übel zuegrichtet gsi aber ned tot. Er ned domm holt en Eisenstange ond schlot ere demit of de Chopf. Das elei esch jo scho gnueg schlimm gsi, aber 2 Koreaner händ das ganze gfilmet mit de Digicams.

Am Ändi vo dem Tag esch plötzli de Bus schto blobe. De JP öffnet d Chüelerhuube de gits e Knall ond de Deckel vom Chüelwassertank flüügt ehm is Gsicht ond s chochend-heisse Chüelwasser sprützt ihm is Gsicht. Er het denn sisi Gsicht i Trinkwassercontainer ghebt wo er im Kofferrum gha het. Während de Wiiterfrahrt händ 2 nätti Koreanerinne ihm abwechselnd s Gsicht küelt mit nasse Tüecher. Wo er bim erschte Huus vom nöchschte Dörfli acho esch, het er gfrogt eb er d Duschi döf benütze, er het natürli chönne, het aber ned dra dänkt dass da Wasser wo i de Leitig esch siedend heiss esch, hebt sin Chopf dronder ond schreit wie am Spiess. Denn esch er so verzwiflet gsi dass er mit de Chleider i Pool ghüpft esch.

Am nöchschte Tag am Obe händ si dänkt si göie scho am Obe of ene Bärg ufe go schlofe de siges am Morge scho dobe. Es het unerwartet afo Rägne ond es esch alles onter Wasser gschtande. Spöter sinds de ines Wasserloch go bade.. de chonnt e dütschi Reiseleiterin ond macht ehn blöd aa mer dörfi do ned bade bla bla bla... er esch zersch aschtändig blobe, aber am schluss rastet er voll us ond schreit si aa. Da het natürli tönt wie ne more.. mega Echo. Wo di ganz Groppe weder zum Bus glofe esch chonnt ehm e Maa entgäge ond frogt wo dass de komischi Maa sig wo en Dütschi beschimpft heig.. de JP antwortet... jo er heig ne witer hinde gse.. ganz e unaständige Cheib :o) Wo si fasch z Alice Springs gsi send hebt er halt anere Ample.. gset es Rad am Bus verbie rolle, luegt hindere ond gset dass es s Rad vo sim Ahänger esch. Er het den glich müesse öber d Chrüzig fahre ond es het Funke gä ond alli Lüüt händ gluegt. Aber de JP esch eifach nur Froh gsi dass er endlich, wörkli z Alice Springs acho esch. De het ehm e Gast no 40$ Trinkgeld gä wöl er alles so tapfer doregschtande het. So sweet!

Wo mer händ müesse zumene Wasserfall abe loufe hani natüri weder e Unfall gmacht. Wie chönnts ou andersch si, i ghöre scho de Sven säge: aah nei, du machsch scho emmer Unfall! I be usgrütscht ond be d Stäge dorabgheit, ha mer de link Fuess verknackst ond s rächte Chnöi prellt ond ufgschürft.. Am andere Morge simmer 2 km go wandere... alles de Berg doruf. Jo toll grad höt müemmer go wandere.. grmpf.. jo easy kämpfi mi halt met miner Verletzige de Berg doruf *ächtz* I ha gmeinnt i chöm nöm dobe aa. Es esch wunderschön gsi aber i ha Schmerze gha wie blöd. I be mit ere wunderschöne Ussicht belohnt worde ha aber im abego beni also fasch gschtorbe.

Ha s operierte Chnöi nöm rechtig chönne strecke ond es het mer alles weh to! A dem Tag hämmer natürli no es zwöits ond es dritts mol müesse go wandere. Immerhin nöm so lang ond so steil doruf wie s erschte Mol.

I de erschte Nacht hämmer zmitzt im Wald imene Naturschutzgebiet öbernachtet. Esch sehr schön gsi. Aber woni am zwöite Obe gse ha wo mer öbernachte hani s Muul fasch nöm zue brocht. Imene Beachhouse direkt am Meer ond de semmer of de Terrasse ghocket ond händ de Sonneuntergang agluegt. Eifach de Wahnsinn gsi. De hämmer no bis wiit id Nacht ine schmutzigi Trinkspili gmacht ond de JP, öise Guide ond Chauffeur esch afig zimmli Blau gsi ond mer händ afig all 2 Minute gseit "We gonna die tomorrow"

Aber erschtunlecherwiis ond glücklicherwiis esch de JP am andere Tag putzmunter ond quickfidel gsi. Ah en Helikopterflug öber d 12 Apostel hani ou no gmacht gha. Meeega schön. wördi jedem empfäle...!! Chli dor de Busch semmer ou no gwalket :o) Esch gloub öppe de zähti Rainforrestwalk woni gmacht ha set i do be aber has mit Würde öber mi lo ergo ;o) gäg de Obe händ d Jungs nochli tshcuttet ond i ha de Ball voll ad Schlöfe verwütscht. Da wär also scho de zwöit Unfall gsi i dene 3 Täg aber der dritte folgt sogleich :o)

Am Obe semmer de ine Bar eis go zie. De hani welle ofs WC, be dor de Türrame glofe, d Glastüre esch grad am zue go gsi, i ha si ned gse ond be voll dri glofe. S het mega weh to, aber mini schwedisch Kollegin esch also sofort azspringe cho ond het mer gholfe. I be so a de Reception gschtande ond ha gschpürt dasi blüete. De nätti Maa hinder em Trese het geistesgägewärtig de Erscht Hilf Chaschte vöre gno ond wie wild drinome gnoschet. Es het det inne zwar nor Pflästerli ond e Schär gha.. aber es het immerhin guet usgse was er gmacht het. Es het wörkli blüetet wie verrockt i ha mini Hand vor em Muul gha ond s Bluet esch mer im Arm no hindere glofe ond am Ellboge denn abetropfet. Igitt! Si händ sich zwar schampar Müeh gä aber studiere hani glich sälber müesse. I ha de Mol grüeft "Paper" de sinds mer WC Papier go hole ond de hani no mol grüeft "Toilet" de sinds de mol of d Idee cho mich is WC z begleite.. sösch wördi gloub höt no a dere Reception schto. Det hani de mol vorsichtig s Muul usgschpüelt ond ha gluegt was mer öberhaut gmacht het. Gset zom Glöck ned so schlimm us wies sich afüelt. I ha eifach e Schnitt a de Lippe, inne gset mer nor de Abdruck vom Zahn ond osse hani iez e „Refe“ ond es schtot so blöd use. Aber i be froh esch ned meh passiert. Wär chli läschtig gsi weni i dere Bar no hät müesse mini Zähn go zämesueche ;o)

Nacher händ si mer es Taxi bschtelt. I ha de im Taxifahrer müesse mi Stadtplan zeige, da wär jo no gnage, nacher esch er aber glich wie e wilde im Züg omenand gfahre ond het da YHA gsuecht ond gsuecht. Am Schluss het er mi blöd agmotzt, wenn ich s nöchscht Mol inere frömde Stadt sig de mües ich mer merke a welere Strossechrüzig mini Unterkunft sig. Da göi also ned wememr da ned wössi. Hani nem de blöd Plan zeigt oder ned??

De krönendi Abschluss esch gsi, dass ich verzwiflet vor em YHA of em Trottoir gläge be ond im Sven probiert ha ofs Natel azlüte ond er eifach ned abgno het. (S nöchscht Mol lüti im Hatschi aa ;o) kleiner Witz am Rande) I minere geistige Abwäseheit eschs mer natürli ned i Sinn cho dass ich ihm hät chönne is Gschäft alüüte. De hani dänkt jojo wär jo es Wunder gsi wenn da klappet hät.. ond be go schlofe.