Abenteuer am Parsenn (oder: Pleiten Pech und Pannen)

mängisch esch s läbe eitönig..ond langwilig wiene sau.. aber ab ond zue werd spannend, au wenns velech chli schmärzhaft ändet....

wie zum bischil sone sonntig nomitag.. s esch de letscht im johr 2007 gsi..

s het mönsche gä die sind denn of davos go skifahre... ond s send ned wenigi gsi wo die idee gha händ... s sind allerdings ned alli am 4i am nomitag vomene snowboarder agfahre worde zum glück...

aber dä mönsch wos det preicht het... esch zersch mol dor d luft gfloge.. (gratis!) relativ hert glandet aber het dank em helm em warme und unverletzte kopf gha :o)

de rettigs-schlitte esch schnäll cho.. allerdings hets mit em ischine vom verletzte bei ned so welle klappe.... chonnt devo wemmer ersch am unfallort merkt dass mer kaputs material debie het. s esch chälter ond chälter worde.... ou di silbrig/goldig glitzerndi thermodecki het nüt me gnützt.. s esch en wohltat gsi ändlich izwängt im rettigs-schlitte z legge... wie e gurke im glas <--nei die händ meh bewegigsfreiheit!

denn eschs talabwärts gange, juhui.. besser als de silverstar im europapark... vor allem chli meh schnee het mer im gsicht :o) chli krankewagefahre... ond scho werd mer weder uspackt ide notfallstation vom spital davos.... de chöme wärmedeckine.. ich schreie vor schmärze.. wöll gfroreni zehen sött mer ned mit ere warme.. fasch heisse decki zuedecke...

s wär alles ned so schlimm gsi wenn si mi ned öppe e halbschtund lang vergässe hätte i miim rüümli enne ond die näbe mir gloub es paar hirzelle z wenig gha hätti, di einzele abteil sind jo nur mit vorhäng trennt. aber das gschichtli muesi verzelle. die frau esch glaub ab em schlitte gfalle ond het rüggeweh gha.

Arzt: wänd si d skihose iez abzie oder spöter?

Patientin: sälbverständlich gar ned!! da tuet vel z fest weh!

A: si muend si sowiso abzie denn zum röntge...

Mutter der Patientin: neei .. da got doch ned!!

P: ich weigere mich!

kurze zeit später.. hose ist runter.. patientin benam sich wie ein wildschwein!

Krankenschwester: so mer gönd iez mo go röntge

M: chani metcho?

K: nei aber si chöne do warte s got schnäll

M: aber i be au chrankeschwöschter!

K: *schweigt*

M: wie lang gots?

K: 10 minute öppe...

M: dörf i do inne rauche?

K: nei aber obe of em dach!

M: do länge mer aber 10 minute ned!! hmm.. de bliibi halt do



i ha mer vorgstellt da sig e teenager wo gsi esch go schlittle mit d eltere.... au so am benäh aa... si esch denn plötzlich of d idee cho dass wenn si nur no öppe all 10 sekunde eimol schnuufet dass de weniger weh tuet im rügge! sensationelli idee gsi! de arzt het denn das au bestätiget ;o)

plötzli got mi vorhang chli uf dor em windstoss ond ere au.. de hani chönne inegüggsle.. da esch also e ca. 35 jöhrigi frau gsi met erere mueter :o) (i bhalte iez mini gedanke för mech)



nachher beni entlo worde ond ha anderthalb stund x-welche lüüt aglütet eb si mi chöne cho hole... s esch öberall öpis dezwösche cho...

nachher sind mi denn doch 2 kollege cho abhole... händ sogar mis auto us de tiefgarage gholt ond händ mer es bett organisiert für d nacht! wow :o)

am andere tag esch denn mis mami cho ond het mich plus mis auto hei gno.. churz bevor mer händ welle de heiwäg aträtte honnt es telefon vom spital davos.. mer sölle no einisch cho... s röntgebild sig verdächtig...

okay simmer nomol vom 5i bes am 7ni im spital gsi.. of de autobahn hets hunger gä... hämmer welle is mövenpick go znacht ässe... *humpel-humpel* denn schtot det es schild vor de tür "silvester am 4 uhr geschlossen" okay.. *zurück humpel-humpel*

de räscht vom obe esch gli verzellt. am halbi 11i hei cho.. denn färnse gluegt ond e fläsche rimus killt...am halbi 12i es bett. am silvester! :o)

wasi vo dem usflug mitheigno ha: 2 schöni blaui stöck - d offroadusfüerig!! mer cha det no sone metallspitz abelo wemmer sich durch schnee und iis mues kämpfe...

es grissnigs kreuzband.. en agrissene meniskus... es agrissnigs inneband ond en idrückte knochen!

ond vor allem d gwüssheit dasi in zuekunft nur no am idiotehügel gone go skifahre oder denn mit ere komplette eishockey usrüschtig ;o)