Mini Impressione:
1. Tag:
- mit Staubsuuger i de grössi vome moderne Handtäschli 2 ganzi Fabrikhalle suuge, wobi mer mues erwähne dass wenn de Filter ned alli 10 minute usklopfet worde esch, d Sugchraft ongfähr bi 0.7 gläge esch ofere Skala vo 0 bis 100 :o)
- es esch s nöie Denner Verteilzentrum gsi z Mägewil. Also ned eifach en offeni Fabrikhalle sondern öppe all 2 Meter en Metallpfoschte wo hesch müesse dromome ond dronder dor suuge. s het jo ou no Querstangene gha. Also de ganz Tag ergendwie of de Chnöi dor das ganze Labyrinth dore.
- zwenig Kabelrolle. Mer händ also gar ned bis z'henderscht hendere chönne suuge, es esch emmer öppe 3 meter vörig blöbe wo ned putzt worde esch. Het niemer intressiert...
- zum Züni e Kafi ohni Zucker.... nach em dritte Versuech hämmer de afig gmerkt dass mer ned e falschi Taste dröckt händ sondern dass de Zucker im Automat inne leer gsi esch.....
- zum zmittag en mega feine Kebab... ond herrlich lustigi Anekdote vo öisere Gruppeleiterin. Wie z.B "joo i ha doch tatsächlich letschthin öppis gwonne bimene Gwünnspiel... weisch was?... en Chrüüzfahrt ed Flumserbärge!!" <-- so en Seich - wo mer is Zvieri händ welle esch s Auto im Rase stecke blebe... mer händs de mit Müeh ond Not weder usebrocht. 2. Tag - agfange hets demit dass mer hätte sölle die neu bauti Passerelle im Shoppi z Spreitebach reinige. Mer sind aber zersch mol 30 Minute eifach verosse vor em Shoppi gschtande ond händ d Passerelle vo osse agluegt bevor de eine cho esch ond öis zeigt het wo mer chönnt afo putze. - denn sind d Vanessa ond ich ofenes fahrbars Gschtell ufe pflenzet worde ond händ müesse Lampene reinige wo fasch a de Decki obe agmacht gsi send. Mer händ emene Maa wo ondedra gschtande esch emmer müesse s Komando gä wenn dass er öis het chönne wiiter schiebe. er het chli e blöde Job gha. Aber esch e loschtige ond vor allem e mega liebe gsi. Er het chli usgseh wie de Al vo "Hör mal wer da hämmert" mer händ ne gfrogt aber er het die Färnsehserie leider ned kennt! - nacher hämmer weder müesse en mega verschmutzte Bode putze..met mega vel Steinli ond Sche wo vel z gross gsi send vör de Suger, obwohl mis Modell het ned mol Zigarettestummel ufgsoge, ond die send jo wörkli ned schwär. Plötzli händ öisi Staubsuuger- jo genau die im Handtäschliformat- de Geist ufgä. Denn esch de Vorarbeiter cho ond het gfonde jo de müese mer hal mit Riisbäse witer putze. Das het denn sone mega Staub gä dass 5 schöni Elektriker wo det hätte sölle Kabel zie, chorzerhand e Rauchpause igleit händ ond met eus händ afo rede. Aso si händ is vel me zämegschisse aber imene Ton wo ganz ond gar ned onagnäm gsi esch ond ou mite e sehr charmante lächle uf em Gsicht. Mer hätte denn am liebschte no veeel meh Staub ufgwirblet dass die nätte Herre gar nöm gange wäre.. aber si händ is de leider weder verloh :o( aber eine vo dene esch de weder zrogg cho ond het eus Feinstaubmaskene brocht... wöl er für sich ou eini gholt het. Mega lieb. - s esch witer gange.... de send alli Arbeiter zu öisem Vorarbeiter go reklamiere es schtübi z fescht, denn esch er öis cho zämeschisse.. er heigi gmeinnt mer Fraue chöine mit Staubsuuger omgo. Hallo?? - mer händ de nachher dörfe go en Terrasse wüsche wo no mega vel Bauarbeiter dorf omeglofe send ond händ müesse schaffe. Dasch ou sone hammer-schlaui Idee gsi. Aber immerhin esch das a de Sonne gsi ond mer händ weder vel nätti Bekanntschafte gmacht. Eine het is sogar sis Tatoo of em Rügge zeigt ond bhauptet das sig vel schöner als s Arschgweih vo velne Girls... - nochhär hämmer no anes paar Orte chönne go wüsche bes es de langsam heizue gange esch.
- es het de eifach gheisse mer müese mit 3 Fraue hei fahre vo dem Institut.. die sige ou do z Spreitebach. Det acho send denn diejenige 3 Fraue weder vom Chliibus wägglofe... s het niemer gwösst wohäre. Nachdem mer 15 Minute gwartet händ send si denn zrogg cho met witere 2 Manne. Da heisst schlussendlich simmer z achte höch ime voll gladnige Bus heigfahre worde. Die Frau wo gfahre esch het de no gfrogt eb öper vo eus s Autobillet heig... velech hät si welle dass öper vo eus fahrt. Das wärde mer nie erfahre.... mer send emu alli wohlbehalte, ond um veli neui Erfahrige riicher, deheim acho.... nemmt mi wonder eb sich die 2 Täg no ergendwenn lönd lo toppe ;o)
